بێ ئه‌وه‌ی‌ كه‌سێك بێت

 

 
 

 

سێ‌ ساڵ ‌‌و چه‌ند مانگ ‌و چه‌ند رۆژه

په‌نجه‌ره‌ی‌ ژووره‌كه‌ت

ڕۆژانی‌ پاییزی‌

باخچه‌كه‌ی‌ به‌رده‌می‌ ئاپارتمان ده‌ژمێرێ‌.

بێ‌ ئه‌وه‌ی‌ كه‌سێك بێت

له‌ڕازی‌ زه‌ردبوونی‌ گووڵی‌ ناو

ئینجانه‌ی‌ بالكۆنت بپرسێ ‌‌و

هیچ نه‌بێ‌

هه‌ر رۆژێ‌ مردنی‌ گوڵه‌كان تۆمار كا  و

بۆ یادی‌ مه‌رگی‌ گوڵ

بۆ یادی‌ مه‌رگی‌ بۆن، یادگارێك جێ‌ بهێڵێ‌.

سێ‌ ساڵ‌ ‌و چه‌ند مانگ‌  و چه‌ند ڕۆژه‌

له‌درزی‌ په‌نجه‌ره‌ و‌ ده‌رگاكه‌ی‌ ماڵته‌وه‌

زریانی‌ بۆگه‌نێك هه‌ڵده‌كات

لووتی‌ با و

كه‌نیسه‌ و

شه‌قامیش پڕ ده‌كات

بێ‌ ئه‌وه‌ی‌ كه‌سێك بێت

له‌په‌ڕه‌ی‌ ده‌فته‌ری‌ ئینساندا

بۆ یادی‌ مه‌رگی‌ لووت

بۆ یادی‌ مه‌رگی‌ هه‌ست

پرسیارێك جێبێڵێ‌.

سێ‌ ساڵ ‌‌و چه‌ند مانگ ‌و چه‌ند ڕۆژه

دایكێكی‌ به‌وه‌فا و دڵسۆزی‌

هه‌زاران كۆرپه‌ی‌ كرم، له ‌له‌شتا گه‌وره‌ بوون

گشت شه‌وێك له‌مه‌مك‌ و

ناو سنگ‌ و

ناو چاوتا

به‌بێ‌ ده‌نگ، ڕاده‌كێشین‌ و ده‌نوون

بێ‌ ئه‌وه‌ی‌ كه‌سێك بێت

له‌ جه‌ژنی‌ له‌دایكبوونیاندا

له‌پرسه‌ی‌ مه‌رگیاندا

بۆ خوشك‌ و

بۆ برا و

بۆ دایكی‌ كرمه‌كان

یاداشتێك جێبێڵێ‌.

‌

له‌ناوه‌ڕاستی‌ مانگی‌ (8)ی‌ 1993دا ته‌رمی‌ پیرێژنێكی‌ سویدی‌ دۆزرایه‌وه‌ له‌ ماڵه‌كه‌ی‌ خۆیدا، كه‌سێ‌ ساڵ‌‌و نیو زیاتر بوو مردبوو، ئه‌م شیعره‌ بۆ ئه‌و پیرێژنه‌ نووسراوه‌.

 

 

 

 

19931004

یۆتۆبۆری