لە ناو تۆدا، ئافرەتێکی کێوی دەژی.
لە ناو ئەودا، پیاوێک کێوی.
هەر ساتێک ئەو بەرەڵاکەی
بەرگی شەرمت، لە شوێنی خۆیدا توڕدەدەی.
بە جەستەی ڕووت و قووتتەوە، خۆت لە سینەی دەریا دەدەی.
بە شیعر دەمدەکەیتەوە و
لەگەل دوورترین ئەستێرەی ئاسمانیشدا
بە بێ وشە، ئاشنایەتی پەیدادەکەی.
بەڵام ئەی کێوی ناو ناخی؟
بۆچی کاتێک زەفەردێنێ و دێتە دەرێ
کچی کێوی ناو ناخی تۆ، خێرا خۆی گورجدەکاتەوە و
نە لە شیعرت هەواڵ هەیە
نە ئاشنایەتی ئەستێرە
کەس نازانێ چۆن لە ناوتا خۆی لوولدەکا و
دیسان بزردەبێتەوە؟
ئاخ بۆ خاتری بینینەوەی جارێکی کەی کچی کێوی ناو ناخی تۆ
بۆ خاتری بەیەکگەیشتنەوەی سینەی تۆ و شەپۆلی دەریا
هەر بۆ خاتری ئەوەی ئەو بە خۆی بێتەوە
ئاخر بۆ ئەوەی هەمیشە، دەنگی شیعرت کێوییانە دەمکاتەوە
کوانێ دەستێ
خۆی بە ناخی ئەودا بکا و
ژیانی ئەم کێوییەی ناخی، بسڕێتەوە؟
21 یانیوه‌ری 2000
